هو وهي (
مزرزرني انا في شنو ...؟ )
صديقي الجميل فيصل خليل...
منور الحوش يا اخوي بي طلتك الجميلة...
وأهديك وكل الأحباب هذا العمل الجميل
من الأديب عبد العظيم الطاهر "نوري" وأهديه عبرك إلى ود أختي الجميل
طارق الأمين عوض وفرقة الهيلاهوب...
هـي وهـو "الجزء الأول...
(1) هي ........
قمت بدري صحيت في عجل
وعست كسري مليت
التقل
ورحت أكابس أكوس في الحِلل
وجيت صنقر أحش في البصل
وريحـتي ريحـة طـير الـرخـــم
وقمت جاري وأخم في الفحم
عيني سـايلي ونفسي إنكتم
كلـو للــدوبال آ السجــــم
راجـي جيتك وربع اللحم
جيتني فاضي قفيفتك عـدم
مزرزرني انا في شنو ..؟
تشنفني أنا في شنو ..؟
(2) هو .....
هابشـاني انـا في شنو
نابشـــــاني انـا لى منو
الشـقـــــاوة عـلي جــــــات ردوم
وفوق كتوفي انا شايل الهموم
وديمي شـايل الليل مابنوم
والنهار في النهزي وأحوم
وبرضو منك جـاييني لوم
حمدي صرة ولوية خشوم
والنبيشي تجـــيني بالكـــوم
هـابشاني انـا فـي شنو
نـابشــــاني انـا لى منـو
(3) هي ....
فـوقي تهرج ليه يـا غشيم
مـاني طيرة وبومـة حــــريم
وماني عايشي هناك في الخراتيم
ياهـو أكلنـا زمان مــن قديم
بى ربيـع الكيـلو أب عضيم
بيهـو نفـرك وسـاد الخشيم
يا تجيبـو و يـا تاكلـو نيـم
مـزرزرني انـا فـي شنو
مـشنفني انـا فـي شنو
(4) هو ....
إن نضمتي حديسك مسيخ
وديمي حسك عالي صريخ
وإن سـتكتي تســوي نفيخ
طوبة وأمشير كاتلاني بالفيخ
وإن نـضمت انا يبــقى لبيخ
وتبقى حــــجي هلال ومريخ
دار أخييتو خشمي يا شيخ
دار أسدو أسمنتي بالسيخ
ماب تعـرفي تســوي التبيخ
كلو صلصة ومتل الفسيخ
وإن فركتي تفــركي فجــيخ
التقـولي فـــركــتي بـتيـخ
أشكي وأبكي انا عاد لى منو
ــــــــــــــــــــــــــــــــــــــــ
هو .......
ماكي عارفي أنا ماهيتي كم ...؟
ماب تكفي قشيش الغـنم
بالجرورة أجيب في اللَّحم
سكر , الشاي , وكوم الفحم
الإســم شغـــال يـا نـدم
ناس يبلعوا خموها خم
وناس عروقن مافيها دم
أشكي وأبكي انا عاد لى منو
...؟
هي ....
لا تفر ضرعاتك علي
ولا تسوي حديس كلو نَي
ما لقيتني انا ماسكي إيدي
وماني راقدي ونافضي كرعي
بطني طامي كفاي العلي
ولا تلحقني انا ناس أفَي
ياخي شانقني انا في شنو ...؟
(6) هو ....
في العواسة تخمجي العجين
متل أكنك عاجناهو طين
وماب تقومي تحمي العوين
باقي وسط الحَي مرفعين
وا شقاوتي انا طاقني عين
قت كفاي انا هوي يا معين
هابشاني انا في شنو ......؟
لايماني انا لى منو .........؟
.................................
(7) هي .....
بالشـناف نـشفت دمّي
وبالكواريك زدت هـمّي
قـدد إضني ولافاهو عِمِّي
الحـديث دُرَّاب تـرمّي
وبرضي صابري وماسكي خشمي
إن بقيت مـاك ود أعمّي
كت شردت ورحت لى أمّي
مشنفني انا في شنو ...؟
شا يلو حالي انا في شنو ..؟
(8) هو
.....
الحـريم هـندام ومـكياج
وإنتي حايمي وسايقي العجاج
بس تقول مدعوكي في الصاج
يا أم خـشيماً ديمي لجلاج
ماب تروقي تعدلي المزاج
قبل أشيب قالـوا لي يا حاج
من وكرتي انا كيف الخراج
داير أسـافر كايس العلاج
سـائل الله كـريم وفـراج
نابشاني انا لى شنو ......؟
وهابشاني انا في شنو ...؟
هي ....
من صباحي أنا يـا حليلي
وطول نهـاري وباقي ليلي
الشقاوة أنـا ياهـا هيلي
مـاني لاقي أجمـو حيلي
إن رقـدت أنا أرقـد عليلي
وإن وقفـت أقيف صح كليلي
وإنت خشمك متل البليلي
بس تكورك وزايد غليلي
نابشني
أنا لى شنو ...؟
(10) هو ....
فـي القوالة خشيمك نصيح
وفي القطيعي لسانك فصيح
مـاك مخلي الحايم صحيح
وماكي ناطي المرضان طريح
فالحي بس فـي الكي والنبيح
وماك مخلي الزول يستريح
وا مغستك يـوم الـوحيح
هابشاني أنا لى شنو
..؟؟؟
(11) هي ...
قاعدي يابا أنا فوق عديلي
وفرعي في الانساب أصيلي
لا مهملـة لا ذليلي
لاني حـاسدي ولا بخيلي
إنت منـك وا فـليلي
نابحني انا في شنو ....؟
ضابحني انا لى منو ...؟
(12) هو
....
إن بقيت جنَّيت عندي حق
وإن كمان بالغيظ قلت طَق
وإن بقيت خرّفت وطَلَق
وإن لبس مركوبي ومرق
وبى حبيل آشميق إتشنق
وإن بقيت بالجاز إتحرق
وإن بقيت أنا فوقك طبق
من نبيحك راسي إتفلق
الحريم الطيبن عبق
وفي الرهافة رهافة الورق
اليشـوفن حـوقل شهـق
وإنتي متل الكان في الصَّبق
ديمي كاشتي وريحتك عـرق
يا المعـاكي عميري إنسرق
وا شقـاوتي أنا ضمّة إتخنق
نابحاني انا في شنو ...؟
جـارحاني لى شنو ...؟
هو ....
حواء وإبليس قالوا أخوان
فـي الغتاتة إنشركوا دكان
اليسـوُّوا يمَحِّـن الجـان
وأصلو إبليس عندو الوان
فـي المقالـب بـاقي فــنان
كان أبونا يعيش في الجنان
بالو رايق تب في أمـان
جنبو جبريل وجنبو رضوان
واليـدورو يجيهو كيمان
كل واحد ماسـك أضان
زنُّوا فوق إضنيهو دُنَّان
ساقوا لى التفاحة عميان
طلقوا وسط الجنّة عريان
مقلبوهو وخلـوا
ندمان
من جنس ناس حواء قرفان
قارفاني انا لى شنو ...؟
قاشراني انا لى شنو ...؟
(14)
هي .....
يشهد الله انا ماني إبليس
ومـا بعرف القول الخسيس
يا أب شنيباً متل الكديس
صح بنقنق أعَلِّي الحسيس
ومرة مرة بسوي حِنّيس
ومرة أقلبو حديسي ملّيس
وإنت شغلك كلّو دسديس
وفي الحديث يظهر لي تدليس
خايفي أغمّد يا مطيميس
فجأة أفتِّح والقاك عريس
وا مغستي انا برقد فطيس
ياخي هاجمني انا في شنو .؟
قاطعو قلبي انا
لى شنو ..؟
(15) هو
....
الحـريم رايقـات تب ظـــراف
عجوة كُرشة تسيح في الشغاف
وإنتي متل الجَّاو في القفاف
اليشوفـك يجـري ويخاف
واللسان ممـدود زي لحاف
بس تهرجي وجنِّك شناف
هارجاني انا في شنو ...؟
راجاني انا لى شنو ...؟
(16)
هي ....
ياني ست الذوق والفصاحة
ويعلم الله انا ست الفـلاحة
وإن بقيت صِح كايس الملاحة
جوَّا سمحـي وأنقط سماحة
والعيون آ أخوي بى صراحة
السمح مربـوط في مراحـا
تمشي فيهو تكوس القباحة
ومـافي مـرةً تلقالا راحـــة
في رويجلاً ساو قلبو ساحة
وعينو طايري ومفرود جناحا
شايفني انا زي شنو ...؟
عارفني انا زي منو ...؟
